Sa chronic kidney disease (CK), ang normal na trabaho ng ating kidney ay unti-unting bumabagsak sa pagdaan ng mga buwan at taon. Sa unang bahagi ng CKD, karamihan sa mga pasyente ay walang mararamdaman na kahit anumang sintomas dahil ang kanilang katawan ay nakaa-adjust sa mga pagbabagong metaboliko na nagaganap sa pagdaan ng panahon. Ngunit ‘pag dumating na sa puntong ang pagtatrabaho ng kidney ay bumagsak na, unti-unti nang makararamdam ng mga sintomas ang pasyente dahil sa pagdami ng lason sa dugo at sobrang tubig sa katawan.
Ano ang mga sintomas ng CKD?
Ang mga sintomas ng CKD ay depende kung gaano kalala ang pagkasira ng kidney. Nahahati ang CKD sa limang stage batay sa paggana o pagtrabaho ng kidney o glomerular fltration rate (GFR). Ang GFR ay nakakalkula batay sa level ng creatinine sa ating dugo.
Unang Stage ng CKD (90-100% ng kidney ay gumagana)
Sa unang stage ng CKD, ang GFR ay mahigit 90 ml/min/1.73m2 subalit may mga makikitang abnormalidad sa mga eksaminasyon sa laboratoryo tulad ng pagkakaroon ng protina sa ihi; abnormalidad sa hitsura ng kidney batay sa X-ray, ultrasound, MRI o CT scan; o may lahi sa pamilya ng sakit na tinatawag na Polycystic Kidney Disease. Karaniwan ay wala pang nararamdamang sintomas ang mga pasyente.
Ikalawang Stage ng CKD (60-89% ng kidney ay gumagana)
Sa ikalawang stage o mild CKD, ang GFR ay nasa 60-89 ml/min/ 1.73m2. Karaniwan ay wala pa ring nararamdamang sintomas ang mga pasyente, ngunit ang ilan ay maaaring makaramdam ng madalas na pag-ihi lalo na sa gabi, altapresyon, mga abnormalidad sa urinalysis tulad ng normal o bahagyang mataas na level ng creatinine.
Ikatlong Stage ng CKD (30-59% ng kidney ay gumagana)
Sa ikatlong stage o moderate CKD, ang GFR ay nasa 30-59 ml/ min/ 1.73m2. Maaaring wala pa ring nararamdaman o bahagya nang nakararamdam ng sintomas ang pasyente. Mayroon ng makikitang abnormalidad sa eksaminasyon ng ihi, at mataas na ang level ng creatinine.
Ikaapat na Stage ng CKD (15-29% ng kidney ay gumagana)
Sa ikaapat na stage ng CKD, ang GFR ay nasa 15-29 ml/ min/1.73m2. Ang mga sintomas ay maaaring kaunti, hindi matukoy, o malala depende sa sanhi ng pagkasira ng kidney at sa mga kaakibat na sakit ng pasyente.
Ikalimang Stage ng CKD (mababa na sa 15% ng kidney anggumagana)
Ang ikalimang stage ng CKD ay ang pinakamalala dahil higit na mababa na sa 15 ml/min/1.73m2 ang GFR. Tinatawag din na End-Stage Renal Dissease (ESRD) o End-Stage Kidney Disease (ESKD), karamihan sa mga pasyente sa stage na ito ay nangangailangan na ng dialysis o kidney transplant. Ang mga sintomas dito ay maaaring mula katamtaman hanggang pinakamalala.
Mga karaniwang sintomas ng sakit sa kidney
- Walang ganang kumain, naduduwal, at nasusuka
- Panghihina, madaling mapagod, at pagbagsak ng timbang
- Pamamanas ng mga paa
- Pamamanas ng mukha, sa palibot ng mga mata lalo na sa umaga
- Altapresyon, lalo kung malala, hindi nakokontrol o sa mga bata
- Pamumutla
- Problema sa pagtulog sa gabi, hindi makapokus at nahihilo
- Pangangati, pamumulikat, o pagkabalisa
- Pagsakit ng tadyang
- Madalas na pag-ihi lalo na sa gabi
- Pananakit ng mga buto, pagkabali ng buto sa adults at mabagal na paglaki sa mga bata
- Kabawasan sa sexual drive at erectile dysfunction sa kalalakihan at mga pagbabago sa buwanang regla sa kababaihan
Sa mga táong may altapresyon, maghinala ng CKD kung:
- Ang edad ay mas bata sa 30 o mahigit 50 nang malaman na may altapresyon
- Malalang altapresyon (higit 200/120 mmHg)
- Mahirap makontrol na altapresyon sa kabila ng regular na paggagamot
- May abnormalidad sa paningin
- Pagkakaroon ng protina sa ihi
- Pagkakaroon ng mga sintomas ng CKD gaya ng pamamanas, walang gana kumain, panghihina, atbp
Ano ang mga komplikasyon ng advanced CKD?
Ang mga potensiyal na komplikasyon ng pasyenteng may advanced CKD ay ang sumusunod:
- Hirap sa paghinga at paninikip ng dibdib dahil sa pagkakaroon ng tubig sa baga
- Malalang altapresyon
- Malalang pagduduwal at pagsusuka
- Malalang panghihina
- Komplikasyon sa central nervous system tulad ng pagkalito, labis na pagkaantok, kombulsiyon, at coma
- Mataas na level ng potassium sa dugo (hyperkalemia) na maaaring magdulot ng kompli